ბლოგი და სიახლეები
ლეკითოსი - ბერძნული დაკრძალვის რიტუალის ატრიბუტი
ფიჭვნარის კლასიკური ხანის სამაროვნების არქეოლოგიური მასალაში უხვად არის წარმოდგენილია არტეფაქტები, რომლებიც საინტერესო და მნიშვნელოვან ინფორმაციას შეიცავს ანტიკური ეპოქის დაკრძალვის რიტუალის შესწავლისთვის. მათ შორისაა ლეკითოსები, რომელიც კლასიკური ხანის ელინური სამყაროს დაკრძალვის რიტუალის ერთ-ერთ ყველაზე გავრცელებულ ატრიბუტს წარმოადგენს.
ფიჭვნარის ბერძნული და კოლხური სამაროვნების გათხრებისას, გვხვდება სხვადასხვა ფორმის, ზომისა და სტილის ლეკითოსები, რაც ასახავს დინამიურ ცვლილებებს ეპოქის მხატვრული ტენდენციების ფორმირების პროცესში.
თუ კონკრეტულად ქობულეთ-ფიჭვნარის სამაროვნებზე აღმოჩენილ ბერძნული კერამიკულ ნიმუშებზე ვისაუბრებთ, გადაუჭარბებლად შეგვიძლია ვთქვათ, რომ ისინი საგულისხმო და ანგარიშგასაწევ მასალას წარმოადგენენ ძველ საბერძნეთსა და შავიზღვისპირეთის ქვეყნებს შორის სავაჭრო-ეკონომიკური და კულტურული ურთიერთობების შესწავლისთვის, აღნიშნული ჭურჭლების, მათ შორის ლეკითოსების, ჩვენ რეგიონში მიკვლევის ფაქტი, დაკავშირებულია კოლხეთში ბერძნული კოლონიზაციის პროცესთან და, პირდაპირ თუ ირიბად, ასახავს ბერძნული კერამიკული წარმოების ტრადიციის და ორიგინალური მხატვრული სტილის გავლენას ადგილობრივი მოსახლეობის მატერიალურ და სულიერ კულტურაზე.
ქრონოლოგიურად, ლეკითოსების პოპულარობა დაემთხვა ძვ.წ. V საუკუნეში ათენის კულტურულ აყვავებას. კლასიკური პერიოდის ათენი მხატვრული და ინტელექტუალური შემოქმედების ცენტრია, მეჭურჭლეობა კი ათენური ხელოსნობის შემადგენელი ნაწილია. არქეოლოგიური მასალა საშუალებას გვაძლევს დავრწმუნდეთ, რომ ათენელი კერამიკოსები ჭურჭლებს, მათ შორის ლეკითოსებს, ამზადებდნენ როგორც პრაქტიკული, ასევე საკულტო მიზნებისთვის. როგორც მოგახსენეთ, ლეკითოსებს გარდაცვლილებს საფლავში ატანდნენ და ასევე მსხვერპლშეწირვის რიტუალშიც იყენებდნენ, რის შესახებ სამარხების გვერდით არსებულ სარიტუალო მოედნებზე მათი მიკვლევის ფაქტი მეტყველებს. ამავე დროს, ლეკითოსებს, ისევე როგორც ლუტროფორიებს, იყენებდნენ საფლავის სანიშნეებადაც. ამიტომ, არ უნდა გაგვიკვირდეს, რომ სამარხებში აღმოჩენილ ლეკითოსებზე მეტწილად გადმოცემუ-ლია დაკრძალვის რიტუალის ამსახველი სიუჟეტები: გლოვისა და განბანვის სცენები, მსვლელობა სასაფლაოსკენ, დასაფლავების პროცესი და ა.შ.
ფიჭვნარის სამაროვნებზე მიკვლეული ლეკითოსების შესწავლა საშუალებას აძლევს მკვლევრებს ობიექტურად გაიზიარონ ჩვენ რეგიონში ბერძნული კულტურული გავლენის მასშტაბი და ნათლად წარმოვაჩინოთ შავიზღვისპირეთის ცივილიზაციების ელინურ სამყაროსთან შეხების ძირითადი ასპექტები.
სხვა სიახლეები
შავიზღვისპირა ქობულეთის ცენტრალური ქუჩიდან - მთებში
ქობულეთის მუნიციპალიტეტში არსებულ რამდენიმე მნიშვნელოვან ადგილზე მოგითხრობთ
ქობულეთის მთავარი ნაძვის ხე აინთო
სხვადასხვა გასართობი ღონისძიება, რომელიც ყველა ასაკის მოქალაქისთვის იყო გათვლილი, 14:00 საათიდან დაიწყო და გვიან ღამემდე კონცერტით დასრულდა.
ჩეხეთის გამოფენა ქობულეთში
ჩეხეთის რესპუბლიკის საელჩოს მხარდაჭერით ქობულეთის მუნიციპალიტეტში გამოფენა მიმდინარეობს